“İftar” ne olğanını añlamağa istegenler bilmeli ki, arap tilinde şu söz orazadan soñ ağız açmaq, hususan, Ramazan ayı devamında aqşam yemegini aşamaq manalarına kele. İftar aqşam namazından soñ, kün qavuşqandan soñ keçirile, onı daa keççe keçirmek ise, – mekruhtır.
Bu sene mubarek Ramazan ayınıñ birinci kününden başlap, Qırımnıñ camilerinde toplu iftarlar keçirile. Aqmescit rayonındaki Aqtaçı Qıyat (Beloglinka) köyünde iftarda üyken ve yaş nesil toplandı.
“Müminlerniñ balalarınen iftarğa kelgeni ğayet quvandıra. Bu – ana-babalarnıñ qorantalarında diniy tahsilge büyük diqqat ayırğanını köstere”, – dep, qayd etti köy imamı Tair Abdurahmanov.
Cürçi (Pervomayskoye) qasabasında da yerli sakinler büyük quvanç ile iftarlarda toplana. “Toplu iftarlarda hususiy birlik müiti üküm süre. Aynı şu sebepten insanlar, pandemiya devirinde toplu iftarlarda toplanmaq imkânı olmağanı içün, kederlene ediler”, – dedi Cürçi rayonınıñ baş imamı Kemal Ğafarrov.
Hatırlatamız, toplu iftarlar Qırımnıñ bütün camilerinde Ramazan ayınıñ soñuna qadar keçirilecek. Böylece, Aqmescitteki Kebir camisinde toplu iftarlar er kün keçirile.
QMDİ matbut hızmeti