Qırım Cumhuriyeti ve Sevastopol şeeri musulmanları diniy idaresinde Tuvğan til kününe bağışlanğan ifadeli oquv yarışı ve Noman Çelebicihannıñ hatıra kününe bağışlanğan “Ebediy yüreklerimizde” mektep inşaları yarışınıñ ğaliplerini tantanalı taqdirlev merasimi olıp keçti.
Müftilikniñ daveti ile Qırım MDİ-ne işleri eñ güzel tanılğan talebeler keldi. Balalarnen birlikte olarnıñ ocaları ve ana-babaları da teşrif buyurdılar. Yarışta Qırımnıñ farqlı bölgelerden balalar qoşuldı – Canköy, Aqmescit, Bağçasaray rayonları ve Eski Qırım şeeri.
Merasim “Ant etkenmen” qırımtatar milliy marşınen başlandı, marş sözleriniñ müellifi – Qırım, Lehistan, Litvaniya ve Aqrusiye Müftisi Noman Çelebicihandır. Toplanğanlar ögünde Qırım Müftisi hacı Emirali Ablayev çıqışta bulundı. O, ocalarğa semereli çalışmaları, talebeleri qırımtatar tilinde yüksek derecelerini numayış etkenleri içün, olarğa teşekkürler bildirdi.
“Oca – ekinci ana-babadır, bala saylağan yolu ocanen bağlıdır. Qırımtatar tilini bilmek, onı inkişaf ettirmek ve güzelligini açıqlamaq istegen yaş nesilni körgende, yüregiñ quvana. Siz büyük iş yapasıñız. Allah sizden razı olsun! Sizge muvafaqiyetler, qorantalarıñızğa bereket ve öz işleriñizniñ güzel neticelerini körmege tileyim”, – dedi Müfti efendi.
Müftilik ğaliplerge bahşışlar azırladı, bu bahşışlar olarğa oquşta faydalı olacaqtır: planşetler, smart-telefonlar, bağsız qulaqlıqlar, abdest ve namaznı ögretici kitaplar ve, elbette, tatlılıqlar.
“Tarih ve edebiyat bilgilerinen bir sırada dinimizniñ bilgileri de pek müimdir. Bu bütün ömüriñiz boyu siziñ temeliñizdir”, – dep, qayd etti Qırım MDİ diniy tedbirlerni teşkil etüv bölüginiñ rehberi Zenife Ablayeva.
Toplanğanlar ögünde “NESIL” oyun ansambli çıqışta bulundı, ansambl rehberi – oyuncı, oca Ernest Prtıhov. O da, ğaliplerni naaliyetlerinen hayırlap, olarğa muvafaqiyetler tiledi.
Balalarğa bahşışlarnı jüri azaları taqdim etti, – dotsent, filologiya ilimleri namzeti, QFU qırımtatar ve şarq filologiyası kafedrasınıñ qırımtatar filologiyası fakultetiniñ rehberi Ediye Memetova ve İ. Gasprinskiy adına qırımtatar kitaphanesiniñ yetekçi usulşınası Elmaz Veliyeva. Olar da, ğaliplerni hayırlap, ocalarğa professional çalışmaları içün teşekkür bildirdiler.
Ocalar da qıymetli bahşışlarnen taqdirlendi.
Yarışnıñ eñ güzel işleri Qırım MDİ resmiy saytında, Qırım MDİ resmiy neşirleri olğan “Hidayet” gazetası ve “İkmet çoqrağı” mecmuasında neşir etilecek.
Al-ı azırda QMDİ-niñ tedbirlerni teşkil etüv bölügi daa bir qaç leyha üzerinle çalışa. Mart ayında “Ezan sedası” müezzinler yarışı başlaycaq, 18 mayıs matem kününe bağışlanıp, “Sürgünlik balaları” kitabı ve aynı serlevhalı videocıyıntıq neşir etilecek.
QMDİ matbuat hızmeti
