Fevzi Yaqubov adına Qırım müendislik pedagogika universitetinde “Bekir Çoban-zade: alim, şair, pedagog” adlı ilmiy-ameliy konferentsiya olıp keçti. Tedbir qırımtatar edebiyatınıñ ulu klassigi, alim türkşınas, pedagog, cemaat erbabı Bekira Çoban-zadeniñ 130 yıllığına bağışlandı.
Konferentsiya çerçivesinde onıñ maarif, icadiy, içtimaiy faaliyeti aqqında maruzalarnen belli Qırım tarihçıları, tilşınasları ve jurnalistleri çıqışta bulundılar.
Qırım Müftisi hacı Emirali Ablayev adından iştirakçilerni Qırım musulmanları diniy idaresindeki diniy tedbirlerni teşkil etüv bölüginiñ rehberi Zenife Ablayeva çıqışta bulundı.
“Qırımtatar hılqınıñ qara devirleri sırasına, 1944 sene, mayıs 18 sürgüninen beraber, 1937-1938 seneleri kire. Bu devirde qırımtatarlarnıñ aman-aman bütün ziyalıları amansızca yoq etildi. Qırımnıñ ve öz halqınıñ inkişafına büyük isselerini qoşqan o insanlar. Olardan biri de – Bekir Çoban-zade. Bugün olarnıñ eserlerini ögrenip, bizler, şu eserlerge esaslanaraq, özümizni ve balalarımıznı terenden añlap, qabul etip, terbiye etmek imkânına saipmiz. Bu mirasnı yañı nesilge qaldırmaq imkânına sipamiz. Bu ulu insanlarnıñ hatırasına yapa bilecegimiz eñ müim şey – umumiy kelecegimiz içün birlik olmalımız”, – dedi Zenife Ablayeva.
İlmiy-ameliy konferentsiyanıñ teşkilâtçıları: Fevzi Yaqubov adına QMPU, Qırım Cumhuriyeti Milletlerara munasebetler boyunca devlet komiteti, İ. Gasprinskiy adına Mediamerkez, Qırım Cumhuriyeti Halqlar dostluğı evi.
Qırım musulmanları diniy idaresindeki diniy tedbirlerni teşkil etüv bölüginiñ rehberi Zenife Ablayevanıñ tolu çıqışını nevbetteki bağlantı boyunca baqıñız:
Qırım MDİ matbuat hızmeti