Aqmescitte Qırım Cumhuriyeti ve Sevastopol şeeri musulmanları diniy idaresiniñ “Yañı baar” leyhasınıñ balaları “Elifbe bayramı”-nı qayd ettiler.
Balalar arap elifbesi, İslâm temelleri ve Quran oquvında yapqan ilk adımlarını numayış ettiler. Er bir bala köstergen ğayreti içün fahriy yarlıqlar ve bala medallerinen taqdirlendi.
Teşkilâtçılarnıñ sözlerine köre, bu sene birden eki bayram oldı. “Yañı baar” leyhası da birinci yubileyini – 5-yıllığını qayd etti. Şu leyiha 2015 senesi, noyabr 19-ta başlatılğan edi.
Bayram programması çerçivesinde balalar şiirler oqudılar, bala yırlarını yırladılar ve qırımtatar halq oyunını icra ettiler. “Emanet” icadiy ansambli “Bayram” yırınen çıqışta bulundı.
Bayram devamında balalar tarafından azırlanğan sergi de namayış etildi. Sergide balalar özleri azırlağan elifbe arifleri ile kitapçıqlar sergilendi.
Teşkilâtçılar balalar içün viktorinalar, estafetalar, meraqlı oyunlar keçirdi, er bir iştirakçige bahşışlar berildi. Bayramnıñ soñunda ise, er kesni bayram tortunen sıyladılar.
QMDİ matbuat hızmeti
