Qırım Cumhuriyeti ve Sevastopol şeeri musulmanları diniy idaresinde “Faydalı ilim” maarif leyhası çerçivesinde “Yañı maneviy-ahlâqiy usullarnıñ qullanıluvı ile Qırım musulmanlarınıñ maneviy degerlerini saqlav ve inkişaf ettirüv” mevzusında tögerek masa olıp keçti.
İslâm temelleri ocalarından ibaret olğan spikerler maruzalarınen çıqışta bulundılar. Hususan, mektepten aldın balalar içün ilâve tahsilniñ emiyeti, mektepten aldın tahsil müessiselerindeki balalarnı meraqlandırmaq içün qullanılğan usullar, musulman şahısnı şekillendirmek içün, müim ber aspekt olaraq, balalarnıñ mantıqiy tefekküriniñ inkişafı, inklüziv tahsil ve onıñ diniy ve dinden uzaq müitte qullanıluvınıñ praktikası, mektepten aldın balalar içün ingliz tiliniñ qullanıluvınen İslâm medeniyetiniñ aşlanuvı ve diger mevzular muzakere etildi.
Maruzalar qoşma körgezme malümatlarnen birlikte oquldı.
Tögerek masanıñ ekinci qısımında iştirakçiler “Eñ faydalı metodik çalışma” başlığı astında işlengen usuliyet qullanmalarınıñ taqdimini keçirdiler. Şu işler arasında Zenura Mustafayevanıñ, Emine Ümerova ile Ayşe Adilovanıñ, Leniye Emirova ile Leylâ Ümerovanıñ leyhaları ayrıca qayd etildi.
Böyle usuliyet çalışmaları ve qullanmalarnıñ taqdimi Qırım Müftiliginde er yıl Qırım MDİ ocalarınıñ pedagogik tecribesini populârlaştırmaq, ocalarnı inkişaf etmege teşviq etmek, icadiy ve professional derecelerini yükseltmek içün keçirile.
“Faydalı ilim” leyhasınıñ rehberi Zeyneb Bairovanıñ sözlerine köre, metodik qullanmalar mektepten evel balalarnen ilâve çalışuv çerçivesi boyunca qullanıla.
“Oqutuv-maarif merkezimizde altı yıldır mektepten aldın balalar içün “Yañı baar” leyhası çalışa. Mında balalar içün farqlı yönelişte inkişaf tögerekleri bar: drama tögeregi, ingliz tili, arap elifbesi, logoped ile hususiy meşğuliyetler ve saire. Mektepten aldın balalar içün ilâve tahsil ğayet müim. Bu olarğa tecribe qazandıra, dünyabaqışlarnı kenişlete, balalar aqranlarınen beraber oquşta güzel seviyeni köstereler”, – dedi Zeyneb Bairova.
Qırım Müftisiniñ muavini Esadullah Bairov ise, öz nevbetinde, qayd etti ki, Qırım müftiligi Qırımda qadınlar maarifine ve tahsilge yönelik teşebbüslerge qol tutmağa er daim azırdır.
QMDİ matbuat hızmeti
