Qırım Cumhuriyeti ve Sevastopol şeeri musulmanları diniy idaresiniñ (Tavriya Müftiyatınıñ) din erbapları Müfti muavini Esadullah Bairovnıñ başlığında Aqmescit şeeriniñ Ana Yurt mikrorayonı camisine kelgen musulmanlarnen beraber toplu iftarda iştirak ettiler. İşbu iftar Muhammed Peyğamberimizniñ (s.a.s.) doğulğanı Mevlid gecesi munasebetinen teşkil etildi. Esadullah Bairov sözge çıqıp, Qırım musulmanlarınıñ maneviy yetekçisi hacı Emirali Ablayev adından er kesni selâmladı ve destek sözlerini bildirdi. “Ayatımızda sınavlarnıñ sayısı artqanınen, bizler daa çoq Yüce Rabbimizge sığınmaq, eyi ameller işlemek, adetlerimizni yaşatmaq kerekmiz. Vatanımıznı saqın terk etmemeli. Olıp keçken er şey Allahnıñ iradesinen kerçekleşe. Buña köre, insan öz yoluna devam etip, duacı olmalı. Öz dualarıñızda mahsus arbiy operatsiyada iştirak etken qırımlılarnı unutmañız. Episiniñ sağ-selâmet evge qaytmasını tileymiz”, – dedi Esadullah Bairov.
İhtar. Sahih hadislerde rivayet etilgenine köre, Peyğamberimiz (s.a.s.) bazar ertesi künleri doğulğanına şükür ifadesi olaraq oraza tuta edi. Eger biz de, Allahnıñ elçisi kibi, şu künde Rabbimiz bergen nimetler sebebinen, şu cümleden büyük nimet – Peyğamberimizniñ dünyağa kelmesi sebebinen oraza tutsa, eyilik yapqan olur. Şu ibadet Peyğamberimizniñ (s.a.s.) sunnetine uyğun olur.
QMDİ matbuat hızmeti