Qırım Cumhuriyeti ve Sevastopol şeeri musulmanları diniy idaresinde elâllıq qaideleri boyunca işini devam etken iş adamlarına elâllıq sertifikatları berildi. İşbu sertifikatlarnı Qırım Müftisiniñ muavini Ayder İsmailov taqdim etti.
Böylece, ufaq ve büyük baş ayvanlarnıñ soyumınen meşğul Arsen Ümerovnıñ şirketi (Bağçasaray), iş ceryanı ve yeri Qırım MDİ “elâl” sertifikatsiyası merkezi tarafından teşkerilip, elâllıq sertifikatını elde etti.
Bundan da ğayrı, Ruslan Muhamecanovğa ait çeşit hamur aşlarını ve et mahsulatlarını azırlap satqan “Bağçasaray mahsulatı” ticariy markası elâllıq sertifikatını devam ettirdi. Şirket ufaq aş, qatmerli hamur mahsulatları, çeşit küfteler, tuvar, qoy, tavuq ve köküş etlerini sata.
Qırım Müftisiniñ muavini Ayder İsmailov elâllıq qaideleri boyunca çalışmağa istegen şirketlerniñ sayısı artqanını qayd etti.
“Qırımda elâl sanayısınıñ inkişafı içün bütün kerekli şarait bar. Qırım ealisiniñ aman-aman 15 % musulmanlardır. Qırım – turistik bölge, bu da elâl turizmniñ tez inkişafı içün bir siltem ola bilir. Ve, müim bir husus ki, insanlar, kettikçe, temiz, sağlıqlı ve faydalı aşaytlarnı saylaylar”, – dedi Ayder İsmailov.
Al-ı azırda Qırımda 46 şirket elâllıq standartları boyunca çalışa.
Qırım MDİ matbuat hızmeti
