Хидает
Мераметли къомшу
Опубликовано:
Герай мераметли, джумерт бир инсан эди. Эвининъ янында фукъаре бир къомшусы бар эди. Шу къомшунынъ ады Хамза эди. Бир кунь Хамзагъа акъча пек керек олды, ве, о, чаресизликтен озь эвчигини сатмагъа къарар бере. Бир къач инсан эвни сатып алмакъ ниетинен, Хамзагъа келелер ве эвнинъ фиятыны сорайлар. – Эвим ичюн эки миллион истейим, – деди Хамза. – Амма шу эв о къадар акъча турмай! – деп итираз этти муштерилернинъ бириси, – бу эв ичюн тек бир миллион бермеге азырмыз! Хамза тебессюмнен: – Эбет, догъру айтасынъыз. Амма меним гузель бир къомшум бар. Онынъ ады Герай. Къомшум эр вакъыт меним сагълыгъымны сорай, мени зиярет эте, эр вакъыт ярдымджым ола, ондан ич бир яманлыкъ корьмедим ве ич бир вакъыт раатсыз олмадым, – деп джевапланды. Буны эшиткен муштерилер: «Бойле гузель, мераметли къомшусы бар олгъан инсан озь эвини сатмамакъ керек!», – дедилер. Герайнынъ исе, Хамза къомшусынынъ акъчагъа ихтияджы олгъанындан хабери ёкъ эди. Амма, бу адисени эшиткен сонъ, Герай чапа-чапа къомшусына келе. – Эвинъни сатмагъа керекмей, – деди Герай, – сайгъылы къомшум, санъа не къадар акъча керек, айт, мен санъа ярдымджы олмагъа тырышырым. Сен киби, виджданлы бир къомшуны джоймагъа истемейим. Бойледже, Хамзагъа озь эвини сатмагъа ихтиядж къалмады ве олар Герайнен даа чокъ йыллар девамында къомшулар оларакъ якъын яшадылар. Бу икяеден насыл десрлер чыкъармамыз мумкюн? Акърабаларымыздан сонъ бизге энъ якъын олгъан инсанлар –къомшуларымыздыр. Эр кунь къаршылашкъанымыз, чокъ вакъыт берабер олгъанымыз къомшуларымызнен яхшы кечинмек динимизнинъ эмиридир. Юдже Аллах Къуран-ы Керимде къомшуларгъа яхшылыкъ япмамызны эмир эте, Севгили Пейгъамберимиз де: «Аллахкъа ве ахирет кунюне инангъан кимсе къомшусына яхшылыкъ этсин» (Муслим); «Аллахкъа ве ахирет кунюне инангъан кимсе къомшусыны раатсыз этмесин», – деп буюргъан (Бухари). Бир башкъа хадисинде Пейгъамберимиз (с.а.с.) бойле буюргъан: «Къомшусы ач олып, озю токъ яткъан бизден дегиль» (Хейсемий, «Меджмеу’з-зеваид»). Къомшуларымызгъа нисбетен энъ биринджи вазифелеримиз булардыр: 1. Къомшуларнынъ акъкъына сайгъы косьтермек, оларны сёз ве арекетлеримизнен ынджытмамакъ. Севгили Пейгъамберимиз Хазрет-и Мухаммед (с.а.с.) бойле буюргъан: «Джебраиль манъа къомшулар акъкъында о къадар насиат этти ки, мен къомшу манъа мирасчы оладжакъ деп белледим» (Бухарий). 2. Кулер юзьлю, татлы сёзлю олмакъ, севинч ве кедерлерини пайлашмакъ. 3. Дерт ве къасеветлерини эксильтмеге тырышмакъ, керек олгъанда, ярдым этмек, борджкъа бермек, бири-бирлерине бахшыш бермек. Севгили Пейгъамберимиз Хазрет-и Мухаммед (с.а.с.) бойле буюргъан: «Бир адам бир муминнинъ дюнья къасеветлеринден бирини кеткизсе, Аллах да къыямет куню о муминнинъ къасеветлеринден бирисини кеткизер» (Муслим). 4. Сеснен ве шаматанен (гурюльтинен) къомшуларны раатсыз этмемек. Аллахнынъ Ресули (с.а.с.) бойле буюргъан: «Аллахкъа ве ахирет кунюне инангъан кимсе къомшусына зарар бермесин» (Бухарий). 5. Хасталангъаны вакъыт, къомшуларны зиярет этмек, вефат эткенде, дженазесине къатнашмакъ, тазие бильдирмек. Севгили Пейгъамберимиз (с.а.с.) бойле буюргъан: «Аллах къатында энъ яхшы дост – достунен яхшы мунасебетте олгъан кимсе, энъ яхшы къомшу исе – къомшусынен яхшы мунасебетте олгъан кимседир» (Тирмизий). Гульсум Ширинская
Ана-бабанынъ вефатындан сонъ олар ичюн нелер япыла биле?
Опубликовано:
Дюнья кечиджи бир имтиан еридир, амма чокъумыз буны унутамыз. Бу дюньяда энъ къыйметли, джанымыз олгъан ана-бабамызнынъ джанларыны агъырта билемиз, дюньялыкъ къыйметлерге алданып, оларны унута билемиз. Олар апансыздан бу дюньядны терк эткен сонъ, башымызны диварларгъа урсакъ биле, оларны къайтарып оламамыз, оларгъа бир кере даа сарылып оламамыз. Афу тилеп оламаймыз, амма динимиз бизге оларнынъ энди дуамызгъа ве Аллахнынъ рахметине мухтадж олгъанларыны огрете. Оларны эр дайым дуаларымызда анъайыкъ. Имам Садыкъ (Аллах ондан разы олсун) шойле буюргъан: «Базы инсанлар баба-анасы аятта экен, оларгъа яхшылыкъ эте; амма, олар ольгенде, борджларыны тёлемей ве олар ичюн Аллахтан магъфирет тилемей. Иште, бундан себеп Аллаху Тааля оларны ана-бабасына урьмет косьтермеген кимселер деп сая. Базы вакъыт кимер инсанлар, ана-бабасы аятта экен, оларгъа нисбетен къатты ве башы тик даврана. Амма, олар ольгенде, оларнынъ борджларыны тёлей ве олар ичюн магъфирет тилей. Аллаху Тааля бойле бир адамны ана-бабасына яхшылыкъ япкъан бир кимсе оларакъ яза» («Усулю Кяфи»). «Ана-бабасына урьмет этмеген кимсе, вефатындан сонъ олар ичюн дуа этсе, Аллаху Тааля оны ана-бабасына итаат эткенлерден язар» (Ибн Эбу’д-дюнья). Эвлятнынъ ана-бабасынынъ вефатындан сонъ да такъдим этеджек акълары бар. Малик бин Рабиа (Аллах ондан разы олсун) бойле анълаткъан: «Хазрет-и. Пейгъамбернинъ (с.а.с.) янында отургъанымыз бир сырада Бени Селеме къабилесинден бир киши келип: «Эй, Аллахнынъ Ресули! Ана-бабамнынъ устюмде вефатларындан сонъ ерине кетире биледжегим акълары бармы?», – деп суаль бергенде, Хазрет-и Пейгъамбер (с.а.с.) бойле буюрды: «Эльбет! Оларгъа саляват кетирмек (дуа этмек), олар ичюн багъышланув тилемек, сёзлерини ерине кетирмек, достларына икрам этмек ве оларнынъ дост ве якъынларынен алякъаны кесмемектир» (Эбу Давуд, Ибн Мадже, Ибн Хиббан). Малик бин Ребиа (Аллах ондан разы олсун) бойле деген: «Мен Ресулюллахнынъ (с.а.с.) къатында отургъаным бир вакъытта апансыздан энсардан бир киши чыкъып кельди. Адам бойле сорады: «Эй, Аллахнынъ Ресули, анам ве бабам ольген сонъ, меним оларгъа япа биледжегим бир яхшылыкъ бармы?» Ресулюллах (с.а.с.) бойле буюрды: «Эльбет! Дёрт шей бар: оларгъа дуа этмек ве магъфирет тилемек, достларына икрам этмек, берген сёзлерини ерине кетирмек, олар тарафындан башкъа сойлары олмагъан акърабаларына козь-къулакъ олып, ярдым этмектир. Иште, ананъ ве бабанъ ольген сонъ сенинъ оларгъа япмакъ керек олгъан эйиликлеринъ булардыр» (Эбу Давуд, Ибн Мадже). Къырымда япылгъан дуа мерасимлери де бу хадислерге эсасланаракъ кечириле. Ана-бабанынъ вефатындан сонъ, олар ичюн хадж этиле биле, къаза оразалары да тутула биле. Бурейде (Аллах ондан разы олсун) бойле анълаткъан: «Бир къадын: «Эй, Аллахнынъ Ресули, мен анама бир джарие (къадын хызметчи) эдие эттим. Шимди анам ольди», – деди. Ресулюллах (с.а.с.): «(Садакъа япкъан) савабынъны мытлакъкъа аладжакъсынъ. Мирас ёлунен джарие санъа къайтаджакъ (текрар сенинъ оладжакъ)», – деп буюрды. Къадын: «Эй, Аллахнынъ Ресули, анамнынъ бир айлыкъ ораза борджу бар эди, онынъ ерине тутсам олурмы?», – деп сорады. Пейгъамберимиз (с.а.с.): «Ананънынъ ерине тут!», – деди. Къадын: «Эй, Аллахнынъ Ресули, анам ич хаджгъа кетмеди, онынъ ерине хадж япсам олурмы?», – деп сорады. Ресулюллах (с.а.с.): «Эбет, онынъ ерине хаджгъа бар», – деп буюрды» (Муслим, Тирмизий, Эбу Давуд). Эвлятнынъ ана-бабасы ичюн берген садакъанынъ савабы эм оларгъа, эм де озюне языла: «Эр анги бир мусульман бир садакъа бергенде, буны мусульман олгъан ана ве бабасы ичюн бере биле. Садакъанынъ савабы эм ана-бабасына, эм де оларгъа языладжакъ. Савапларындан эксильтмеден, айны микъдарда озюне де язылыр» (Табераний). Мевзунен алякъалы дигер хадислерде бойле буюрыла: «Кишининъ бабасынынъ севгенлерине (вефатындан сонъ онынъ достларына) ярдым этмеси, яхшылыкънынъ энъ юксек дереджесидир» (Муслим); «Ким бабасыны къабиринде зиярет этмеге истесе, онынъ озюнден сонъ къалгъан аркъадашларыны зиярет этсин» (Ибн Хиббан); «Ана-бабанынъ къабирини джума куньлери зиярет эткеннинъ гунахлары афу олуныр, акълары тёленген олур» (Тирмизий); «Ана-бабасынынъ я да бирининъ къабирини ихляснен ве магъфирет истеп, зиярет эткен кимсе къабул олгъан бир хадж савабыны алыр ве буны девамлы япкъаннынъ кабирини де мелеклер зиярет этер» (Хаким). Аллаху Тааля бизлерге не бу дюньяда олгъанларында, не де кеткенлеринден сонъ, ана-бабамызны унуттырмасын! Раим ГЪАФАРОВ
Пейгъамбер Эфендимиз (с.а.с.) ве тасиль
Опубликовано:
Биз Мухаммед Пейгъамбернинъ (с.а.с.) мусульман яшларнынъ тербиесинде ойнагъан ролюни огренмеге девам этемиз. Пейгъамберимиз яшларнынъ тасиль алгъаныны чокъ истеген ве даима оларны тиллер ве илимлерни огренмеге давет эткен эди. Мединеге иджрет эткен сонъ, Пейгъамберимиз джамиси янында «Суффе» деп адландырылгъан мектепни ачты. Мектепнинъ талебелерини «Асхаб-ы Суффе» деп адландыргъан эдилер. Талебелернинъ сайысы 70-400 инсан дживарында эди. Мухаммед Пейгъамбер (с.а.с.) шахсен озю де яшларнынъ тербиеси ве тасиль алмасында иштирак эткен эди. Яш, тасилли сахабелер несили илериде Ислям медениети ве илимининъ гузель бир темели олды. Мухаммед Пейгъамберни (с.а.с.) тек корьмек дегиль де, ондан тасиль алмакъ бахтиярлыгъына Энес бин Малик, Али бин Эбу Талиб, Усаме бин Зейд, Абдуллах бин Омер ве дигерлери наиль олдылар. Пейгъамбер (с.а.с.) Аллахкъа итаат эткен ве Ислям ахлякъынен яшагъан яшларны мужделеди, оларнынъ Къыямет куню Аршнынъ талдасы тюбюнде оладжакъларыны бильдирди. Шубесиз, Юдже Аллах бойле къулларыны севе. Пейгъамберимиз хадисинде бойле дей: «Аллаху Тааля генчлигини Аллахкъа итаат ёлунда кечирген яшны севе» (Суютий). Бойле яшларгъа Пейгъамбер (с.а.с.) башкъаджа даврана эди. О, оларнынъ инкишафыны эм маневий, эм де маддий тарафтан дестеклей эди. Умернинъ огълу Абдуллах бойле тариф эткен эди: «Бир кере мен, сеферлернинъ биринде, Пейгъамбернинъ (с.а.с.) янында эдим. Мен бабама аит олгъан яш девенинъ устюнде эдим. Онъа баш этип оламадым, о, эп Пейгъамбернинъ (с.а.с.) огюне чапа эди. Бабамнынъ кейфи бозулды ве, о, манъа девени, Пейгъамбернинъ (с.а.с.) огюне чапмасын деп, тынчландырмамны буюрды. Пейгъамбер (с.а.с.) буны корип, бабамдан мен отургъаным девени сатмагъа риджа этти. Бабам ич тюшюнмеден: «О сизинъкидир», – деп айтты. Деве алынгъан сонъ, Пейгъамбер (с.а.с.) манъа чевирилип, бойле деди: «Энди бу сенинъ девенъ, оны насыл истесенъ, ойле де къуллан» (Бухарий). Пейгъамбер (с.а.с.) сахабелерине нисбетен чокъ гузель даврана эди. Олар ичюн къасевет этип, Ахиреттеки ерлери ичюн чокъ тюшюне эди. Онынъ ичюн эм бу дюньяда, эм де келеджек дюньяда ярдым этеджек тевсиелерни сыкъ-сыкъ бере эди. Бир куню Пейгъамбер (с.а.с.) Муазны къолундан тутып: «Эй, Муаз, емин этем ки, севем сени!», – деп айтты. Муаз исе: «Ант олсун ки, мен де сизни севем, эй, Аллахнынъ Пейгъамбери!», – деп джеваплады. Бунъа Аллахнынъ Эльчиси бойле къаршылыкъ берди: «Эй, Муаз! Эр бир намаздан сонъ санъа бойле дуаны окъумагъа тевсие этем: «Аллахым! Сени зикир этмек, Санъа шукюр этмек ве гузель къуллукъ япа бильмек ичюн манъа ярдым эт!» (Ахмед, Эбу Давуд). АЙШЕ ДУРАН
ЯХЪЯ ИБРАГИМОВ: «Мен озюмни ойле дуйдым ки, санки мен бу ве келеджек дюньяда буюк бир шейге ириштим!»
Опубликовано:
15 яшыны толдургъан Яхъя Ибрагимов Къырымнынъ энъ яш хафызларындан биридир. О, дёрт йыл ичинде Мукъаддес Къуран-ы Керимнинъ эписини эзберледи. Яхъя якъында шерефли хафыз унваныны алды ве бизнен озь аят ёлунен пайлашты. Рубрикамызнынъ къараманы – Къырым Джумхуриети ве Севастополь шеэри мусульманлары диний идаресининъ Хаджы Ихсан адына Къалай ислямий илимлер медресесининъ хафызлар болюги талебеси Яхъя Ибрагимовдыр. Хафыз – динимизде чокъ шерефли бир унвандыр. Насыл ве не вакъыт сиз озюнъизге Къуранны эзберлемек макъсадыны къойдынъыз? Мен он эки яшында олгъанымда, озюме Къуранны эзберлемек макъсадыны къойдым. Ве бу ёлда манъа анам ве бабам ярдым эттилер, насиатлар бердилер. Олар эр вакъыт: «Огълум, эзберле, хафыз олмакъ – буюк бир дередже. Аллах санъа буюк къапылар ачар, иншаллах», – дей эдилер. Насыл эзберлединъиз? Бир тертип олдымы? Медресемизнинъ Къурман хафызлар болюгинде тюрк усулы чалыша ве мен де бу усулгъа коре эзберледим. Къуранда 30 джуз, яни 20 саифеден ибарет парча бар. Талебе биринджи джуздан башлап, эр джузнынъ сонъки саифесини эзберлей. 30 джузгъа кельген сонъ исе, текрар Къураннынъ башына къайта ве сонъ саифесинен бир эвелькисини де эзберлей. Ве Къуранны тамамлагъандже, бойледже девам эте. «Къуранны эзберлемек ичюн дёрт йыл керек олды» Кьуранны эзберлемек ичюн не къадар вакъыт керек олды? Манъа бутюн Къуранны эзберлемек ичюн дёрт йыл керек олды, айны заманда мен мектепте де окъудым. Асылында, медреседе окъугъан вакъытымны мен энъ яхшы йылларым деп саям. Чюнки медреседе окъугъан вакъытта биз достларнен берабер денъизге, кезинтилерге бара эдик. Футбол, теннис боюнджа спорт ярышларына къатнаша эдик. Диний ярышларда да иштирак эте эдик, ифтарларгъа бара эдик. Онынъ ичюн, бу вакъытны мен буюк хошнутлыкъ иле хатырлайым. Медресе меним экинджи аилем олды. Шимди юксек хафыз унванына наиль олдынъыз. Невбеттеки адымлар насыл оладжакъ? Келеджекте мен Ислям динини даа терен огренмек ичюн башкъа Ислям муэссиселеринде окъумагъа истейим. Мектепни битирип, мусульман мемлекетлерине бармагъа ве анда озь бильгилеримни пекитмеге ниетим бар. Анда дигер хафызларнен танышмакъ ве олар Къуранны насыл тертип боюнджа эзберлегенлерини бильмек ичюн авесленем. Оджалыкъ япмагъа ниетим бар. Башкъаларны огретмеге истейим, чюнки Пейгъамберимиз (с.а.с): «Энъ хайырлыларынъыз – Къуранны огренген ве огреткенлеринъиздир», – деп айтты. «Агъамнынъ «Эр кес хафыз оламай» сёзлери мени ильхамландырды» Бу ёлда сизге ким ярдым этти ве ильхамландырды? Оджанъыз ким? Мени агъам ильхамландырды. О, бу ёлгъа менден эвель турды ве манъа насиат берди. Бир кунь о манъа: «Эр кес хафыз оламай», – деп айтты. Бу сёзлер манъа бир сильтем киби олды. Чюнки бундан сонъ мен де хафыз олмагъа пек истедим. Не исе, белли вакъыт кечкен сонъ, мен макъсадыма еттим. Меним сонъки оджам Самединов Сулейман оджа олды. Онынъ оджалыгъы вакъытында мен Къуран-ы Керимни сонъунадже эзберлемеге етиштирдим. «Хафыз олмакъ ниетим – яшайыш тарзым олды» Озюнъиз акъкъында тариф этинъиз. Мен Багъчасарай районында яшайым. Орта тасиль мектепте окъуйым, 9 сыныфны битирдим. Буюк достане къорантада осьтим. Бабам дюльгер, анам эв бикеси. Къорантамызда балалыкътан динимизге севги ашлана, биз эпимиз медреседе окъудыкъ. Балалыкътан бабам мени Къуранны окъумагъа огрете, дин тёгереклерине алып бара эди. Сонъра мен озюм де меракъланмагъа башладым. Башта агъам Къурманда хафызлар медресесининъ талебеси олды. Ве мен балалыкътан о насыл Къурандан аетлерни эзберлегенини коре эдим. Мен де ондан орьнек алып, озюм де хафыз олмагъа истедим. Оськен сайын, анъладым ки, меним хафыз олмакъ ниетим – яшайыш тарзым олды. Медреседе окъумагъа башлагъанда, анда янъы достлар, оджаларнен таныш олдым. Ве Аллахнынъ истегинен Къуран-ы Керимни эзберлеп тамамладым. «Сен не ерде ве не вакъыт булунгъанына бакъмадан, эр ерде Къуран-ы Керимни окъуй биледжексинъ» Шимди насыл бир дуйгъуларны ис этесинъиз, теэссуратларынъызнен пайлашынъыз. Мен озюмни ойле дуйдым ки, санки мен бу ве келеджек дюньяда буюк бир шейге ириштим. Бу ойле бир аджайып бир дуйгъу ки, сен не ерде ве не вакъыт булунгъанына бакъмадан, эр ерде Къуран-ы Керимни окъуй биледжексинъ. Озь макъсадыма иришкен сонъ бир енгиллик ис эттим, амма бунен берабер бу буюк бир месулиет олгъаныны анълайым. Къуранны огренмеге башлагъан инсанларгъа насыл тевсиелеринъиз олур? Ким Къуран-ы Керимни эзберлемеге истесе, бильсин ки, онъа базы шейлерден вазгечмек керек оладжакъ. Меселя, сабыр этмек ве гъайрет косьтермек керек. Сонъра, ким эзберлемеге башлагъан олса, бу ишни ташламасын ве даима чалышсын! Эвелина АБЛЯЗОВА
Исра ве Мирадж
Опубликовано:
Март 21-22 куньлерини багълагъан гедже – мубарек Мирадж геджесидир. Келиме оларакъ «юксельмек, юксекке чыкъмакъ, юксельмеге ярдым эткен васта» анъламларына кельген Мирадж, инсанлыкънынъ къуртулышы ичюн ёлланылгъан Севгили Пейгъамберимизнинъ, Юдже Аллахнынъ сонъсуз къудретининъ эсерлерини сейир этип, Онынъ хузурына юксельгени мукъаддес ве маневий бир ёлджулыкъ, кяинатнынъ Юдже Яратыджысынынъ давети узерине керчеклешкен муджизевий бир корюшмедир. Юдже Аллах ёллагъан пейгъамберлерини теблигъ вазифесинен баш-баша быракъмагъан, оларгъа вахий иле ёл косьтергени киби, заман-заман чешит тюрлю муджизелер иле де ярдым берди. Иште, Пейгъамберимиз Хазрет-и Мухаммеднинъ (с.а.с.) энъ буюк муджизелеринден бири де – Мирадж адисесидир. Мирадж хиджреттен бир бучукъ йыл къадар эвель, тахминен милядий 621 сенеси, къамерий такъвимге коре, Реджеп айынынъ 27-нджи геджесинде, Пейгъамберимизнинъ эмджеси Эбу Талиб иле апайы Хазрет-и Хатидженинъ вефат эткени, мушриклернинъ баскъылары арткъаны, Таиф зияретинде уджумгъа огърагъаны ве мушриклернинъ сыкъыштырмаларына даянамагъан базы мусульманларнынъ Хабешистангъа кочьмек зорунда къалгъаны бир заманда мейдангъа кельди. Иште, бойле бир вазиетте Юдже Аллах Пейгъамберини Мирадж иле мукяфатландырды. Бир гедже вакъыты буюк мелеклерден Джебраиль (а.с) Пейгъамберимизни «Буракъ» адындаки бир васытанен Меккедеки Месджид-и Харамдан Къудустаки Месджид-и Акъсагъа алып барды. Ичинде бир чокъ икмет ве иляхий сырлар олгъан бу гедже «Исра» суресининъ биринджи аетинде бойле анълатыла: «Бир гедже онъа аетлеримизден бир къысымыны косьтерейик дие, (Мухаммед) къулуны Месджид-и Харамдан этрафыны мубарек эткенимиз Месджид-и Акъсагъа алып баргъан Аллах нокъсан сыфатлардан узакътыр; О, акъикъатен эшитиджи, корюджидир». Месджид-и Акъсадан сонъраки Мирадж ёлджулыгъы акъкъында бильгилеримиз Пейгъамберимизнинъ хадис-и шерифлерине таянмакъта. Бу мевзудаки хадислерде Пейгъамберимизнинъ Джебраиль (а.с.) рефакъатында, ич бир инсангъа насип олмайджакъ бир шекильде, заман ве ер ольчюлерине уймагъан алда, коклерге юксельгени, онъа пек чокъ маневий макъам ве вазиетнинъ косьтерильгени, ниает, Юдже Аллахнынъ хузурына чыкъкъаны кенъиш бир шекильде анълатыла (Кенъиш бильги ичюн бакъынъыз: Бухарий, «Бедъу’ль-халькъ», 6; Муслим, «Иман», 264). Айрыджа, Мираджнынъ сырларынен толу бу болюми «Неджм» суреси 53/5-18 аетлеринде бойле анълатыла: «Оны кучьлю-къуветли ве устюн яратылышлы бири (Джебраиль) огретти. Сонъра, энъ юксек уфукъта олгъанда, асыл шекилинен догъруланды. Сонъра (Мухаммедге) якъынлашты дегенде, даа да якъынлашты. О къадар ки, (бирлештирильген) эки яй арасы къадар, атта, даа да якъын олды. Бундан сонъ, Аллах къулуна вахийини бильдирди. (Козьлеринен) корьгенини къальби яланламады. Онынъ корьгенлери акъкъында шимди онынънен тартышаджакъсынъызмы? Ант олсун, оны Сидрету’ль-Мунтеханынъ янында эвельде бир кере даа корьген эди. Мева дженнети де онынъ янындадыр. Сидрени къаплагъан шей оны къаплагъан эди. Козю къыйыгъындан бакъмады ве сынъырны ашмады. Ант олсун, О, Раббининъ энъ буюк аетлеринден бир къысмыны корьди». Пейгъамберимизнинъ энъ маналы ве энъ буюк муджизелеринден бири олгъан Мирадж Ресулюллахнынъ шахысында инсанлыкънынъ огюне ачылгъан сынъырсыз бир юксельме уфугъыдыр. Бу адиседе маддий ве маневий юкселишке, бутюн алчакъ дуйгъулардан, эр тюрлю ярамайлыкълардан арынып, керчек къуллукъкъа, энъ юдже дереджеге иришмеге мумкюн олгъанына ишарет бар. Мирадж геджесининъ мусульманлар ичюн муим нетиджелеринден бири, ич шубе ёкъ ки, Ислям динининъ темель диреги ве муминлерге бир Мирадж эдиеси олгъан намаздыр. Онынъ ичюндир ки, «Намаз мумининъ Мираджы» олгъандыр. Насыл ки, Севгили Пейгъамберимиз (с.а.с.) Мираджда васталардан арынып, Мевлясынен корюшкен олса, мумин де намазда вастасыз, догърудан Раббининъ хузурына чыкъа, ялынъыз Онъа къуллыкъ этме ве ялынъыз Ондан ярдым истеме фурсатыны къазана. Айса, мумин куньде беш вакъыт намазыны дикъкъатнен ве хушу ичинде къыладжакъ олса, о намаз онынъ ичюн бир Мирадж олур ве къул онен Хакъкъа ёл тапар. Мираджнынъ дигер бир эмиетли нетиджеси – «Бакъара» суресининъ сонъ эки аетининъ назиль олмасыдыр. «Аменеррасулю» деп анъылгъан ве ятсы намазындан сонъра окъулгъан бу мубарек аетлерде иляхий эмирлер къаршысында мытлакъ итааткъа ёнельген муминлернинъ инанчларындаки садакъатлары ифаде этиле. Мираджнынъ бир башкъа нетиджеси исе, Хазрет-и Пейгъамбернинъ умметинден Аллахкъа ширк къошкъанлар тышындакилернинъ афу этиле биледжеклерининъ ваде этильмесидир. Инсан билип я да бильмейип гунах япа биле. Ишлеген гунахлардан себеп пешманлыкъ дуйып, Аллахтан афу тилемек – бир даа бу гунахны ишлемемек шартынен, ишленген гунахларны силе биле. Бу мевзуда Къуран-ы Керимнинъ «Ниса» суреси 48-инджи айетинде бойле буюрыла: «Аллах озюне ортакъ къошулувыны асыл багъышламаз; бундан башкъасыны (гунахларны), истеген кимсеси ичюн багъышлар. Аллахкъа ортакъ къошкъан кимсе буюк бир гунах (иле) ифтира эткен олур». Бу гедже дюньяда инсанларнынъ пек буюк арзу ве истеклери себебинден къаршылашкъанлары сыкъынтылардан къуртулмакъ ичюн, Аллахнынъ сонъсуз мерхаметине сыгъынмакънынъ ве инсанлыкънынъ къуртулышы ичюн Онъа ялвармакънынъ вакъытыдыр. Бу мубарек гедженинъ ышыгъында бирлик ве бераберлик, къардашлыкъ ве ярдымлашма, севги ве сайгъы киби дуйгъуларымызны пекитейик. Эр йылнынъ Мирадж геджесинде Месджид-и Акъсанынъ бизлер ичюн эмиетини ве шимдики алыны эр вакъыт акъылымызгъа кетирейик. Юдже Раббим джумлемизге Мирадж геджесини мубарек этсин. Ремзи КЪУРТДЕДЕ
Миск джами
Опубликовано:
1666 сенеси тюрк сеяатчысы Эвлия Челеби Эски Къырымнынъ сокъакъларындан кечип, шеэрнинъ мухтешемлигинден ве, айны вакъытта, виране алындан айретте къалгъан эди. Биналар арасында, о, Амбер Чин (яни Чин Амберли) адлы джами къалымтыларына дикъкъат этти. Эвлиянынъ языларына коре, ягъмурдан сонъ бу къалымтылар этрафына индже миск къокъусы яйгъан экен. Шеэр эфсанесине коре, бир зенгин сатыджы шеэрде озь акъчаларынен джами къурмагъа истеген. Иншаатта олгъан куньлерининъ биринде, о, къыйметли миск ве амбер къокъулар юкюнен кечкен туджджарны корьген. Эфсанеге коре, бай адам туджджардан мисклерни сатын алып, джами къурулышында къыйметли мискнинъ къошулып къулланылмасыны истеген. Бу ривает бир хаял мубалягъасы дегильдир, бу реаль аньаненинъ аксидир. Якъын Шаркъ мимарджылыгъында бинанынъ гузель къокъусы ичюн къурулыш эснасында мискнинъ къошулмасы эвель заманлардан беллидир. Миск – бу хош ве чокъ тургъун бир къокъудыр, о эшьяда, энъ азындан, он йыллар ичинде сакъланыла биле. Миск пек паалы маддедир, оны иншаат тёшемесинде къулланмакъ – акъылгъа сыгъмагъан параны масраф этмек демектир, онынъ ичюн дюньяда бойле биналар чокъ дегильдир. Мисаллер арасында Мароккодаки Марракеш шеэринде джами минареси, Тебризде Зобейде джамисининъ михрабында миск сывамасы, Шаркъий Тюркиедеки Диярбакъыр шеэринде Сафа джамисини де къайд этмек мумкюндир. Эски Къырымдаки Миск Джамиден фаркъ этерек, Диярбакъырдаки миск джами бу куньге къадар сакъланды. Шаркъий Тюркие (Анадолу, Сельджукълы) Къырымда мусульман медениетининъ шекилленмесине буюк тесир эткен ердир. Тамам о ерлерден орду заманынынъ къырымтатар санаты белли олгъан сельджукъ орьнеклерини, диний мимарджылыкъ нумюнелерини ве медениетнинъ башкъа пек чокъ мисаллерини менимседи. XIV-XV асырлары Къырым ве Анадолу медениетлери пек якъын олып, бири-бирине бенъзеген. Демек ки, Миск Джами акъкъында эфсанелер уйдурма ве масал дегиль де, керчек иншаат акъкъында хатырадыр. Эски Къырымда бугунь де Миск Джами оларакъ адландырылгъан къалымтылар бар. Амма, оларны къолай-къолай коремезсинъ. Сакъланып къалгъан дивар темеллери эски шеэрнинъ сокъакълары, шахсий эвлер азбарларынынъ теренликлери арасындадыр. Къалымтылар медений мирас абиделерининъ девлет джедвелине кирсетильмеген, къорулгъан объект дегиль ве оларгъа сербестче барып бакъмакъ ёлу ёкътыр. Бозулгъан дивар къалымтыларына тек эв саиплерининъ изининен кирмеге мумкюн. Виранелер устюнде аран ве къоралар къурулгъан, къалгъан тёшемелернинъ буюк къысмы исе, онйыллар эвельси бутюнлей бир де бир ходжалыкъ ишлери ичюн парчаларгъа айырылып, сёкюльген. Яни, ачыкъчасы, бакъыладжакъ шей де, аман-аман ёкъ. Кунюмизде анда ич бир къокъу да ёкъ: ташлар не ягъмурдан сонъ, не де атеште къокъумайлар. Виране алында олгъан шу къалымтылар даа ич бир заман археологлар тарафындан джиддий огренильмеди. Тек бир шейни эминликнен айта билемиз ки, огюмизде орта асырларгъа аит буюк бир бинанынъ къалымтыларыдыр. Бу къалымтылар даа да чокъ джамиге ошайлар, буны къалавнынъ чешитинден анъламакъ мумкюн. Къалгъан бутюн нетиджелерни тек алимлернинъ темелли ишлеринден сонъ чыкъармагъа мумкюн оладжакъ. Умют этемиз ки, Миск Джами оларакъ тахмин этильген джами излери тамамен ёкъ этильмегенине къадар тедкъикъатчылар абидени огренмеге ве къорув алтына алмагъа етиштирирлер.и Алие Сеферша
Ифта в интернет-пространстве
Опубликовано:
Часто мы ищем ответы на вопросы религиозного характера на просторах интернета и открываем самые популярные и рейтинговые ссылки. Однако кто стоит за ответом? Стоит ли относиться критично к вопросу выбора источника? Термин «ифта» означает давать фетвы. А фетва – это ответ на вопрос в виде религиозно-правового заключения. Люди часто обращаются к малознакомым сайтам на исламскую тематику, читают статьи или просматривают видеоролики, где автор указан под псевдонимом с претенциозной приставкой «шейх» или не указан вовсе. Готовые ответы, подписанные именами «шейхов» пользуются спросом, однако содержание большинства из них оставляет желать лучшего. Возникает много вопросов в плане языка, стилистики, подачи материала, адекватности анализа, и, конечно, достоверности. Способ дачи ответа в сетях интернета, в подавляющем большинстве случаев, банален – это перепечатка. Многие сайты, блогеры или активные интернет-пользователи не обладают необходимым интеллектуальным и научным ресурсом, чтобы самим изучить вопрос. Но при этом очень хочется «послужить» Исламу, а к тому же это привлечение рейтингов и «паствы». Нечего ей, «пастве», пастись на других интернет-ресурсах и получать знания у других шейхов. «Чем я не шейх?!», – задаётся вопросом очередной «радетель» Ислама и начинает научные изыскания по методике копипаст. Но проблема в том, что копипастить тоже нужно уметь, ведь фетвы, выданные, например, в ЮАР, Иордании или Саудовской Аравии могут не соответствовать региону проживания «шейха». Элементарно могут отличаться исторически сложившиеся стереотипы мышления, культура, традиции, менталитет, мазхаб, законодательство, специфика социально-культурных взаимоотношений и география проживания. Все эти моменты должны учитываться при вынесении фетвы. Ещё одна проблема в том, что порой даже институты по фетвам говорят то, что не совсем соответствует действительности, как в случае с сетевым маркетингом, когда последний путают с финансовой пирамидой и начинают раздавать запреты направо и налево. Придумывая и приписывая сетевому маркетингу то, чего там нет, а именно проценты, гъарар, нетрудовой доход, невозможность возврата, невыплату налогов и т.д. Но при более детальном изучении обнаруживается, что всё это надумано и преувеличено. Некоторые «шейхи» пытаются аятами и хадисами опровергать общеизвестные научные факты, например, шарообразность Земли, вращение Земного шара вокруг своей оси, движение Солнца, а также молекулярное изменение свиных ингредиентов в желатине и многое другое. Читаешь фетвы, а там аяты и хадисы, высказывания табиинов, правоведов и хадисоведов, а также проповедников всех времён и народов, нет только специалистов в данных областях. Ведь сотни слов дилетантов не сравнятся с одним словом специалиста в конкретной области. Ну почему бы просто не обратиться к мнению астрономов и астрофизиков, которые посвятили изучению небесных тел всю свою жизнь!? Почему бы не выслушать инженера-технолога по производству желатина и не получить результаты лабораторных исследований на предмет изменения химического состава ингредиентов данного вещества. Разве не от этого зависит, произошла «истихаля» или нет?! Каким образом шейхи в советах по фетвам, сидя в кожаных креслах, определяют, изменилось ли молекулярное строение?! Разве не логичнее приложить результат химического анализа, и на основании сего документа сделать выводы. Ведь всё сразу станет ясным и понятным. Но нет, мы будем пытаться доказывать трансформацию химического состава молекулы свиного коллагена хадисами! И всё это перепечатывается без осмысления, без адаптации к региональным особенностям. Естественно, люди нуждаются в своевременной и квалифицированной помощи в приобретении знаний. Возможно, в некоторых случаях не нужно изобретать велосипед, а можно просто поделиться, процитировать, в конце концов, перепечатать. Однако, учитывая огромное количество информации на просторах интернета, необходимо уметь разбираться и ориентироваться в этом море фетв и суждений, которые далеко не всегда соответствуют научным критериям и региональным особенностям ищущего ответ. Следовательно, такой ответ ему не подходит и создаст дополнительные необоснованные трудности, которых при правильном подходе можно было бы избежать. Проблема в том, что всё это отражается на Исламе. Ведь мы не свою теорию распространяем, а преподносим религию Всевышнего Аллаха. И если, вследствие излишнего затруднения или ужесточения, человек отвернётся или неокрепший разуверится, разочаруется, разве Всевышний не спросит с нас? Если мы дадим неправильный ответ, не разобравшись в вопросе, кто будет отвечать за последствия? Вспомним, как Посланник Аллаха (с.а.с.) разгневался на тех, кто дал неверную фетву и человек умер. Он сказал: – Они убили его! А скольких убили смелые муфтии, шейхи и муллы? Конечно, ответственность следует и за другую крайность, когда непомерно смягчается иное положение религии. Ведь это выход за рамки дозволенного. Поклонение не будет приниматься, если не выполняются определённые условия. Кто будет отвечать за непринятые поклонения вследствие неправильной фетвы?! Конечно же, муфтий, который выдал такую фетву и тот, кто распространял её. Поэтому Посланник Аллаха (с.а.с.) сказал: «Самый смелый из вас давать фетвы – это самый смелый перед огнём»! ИСМАИЛ Кескин
Номан Челебиджихан акъкъында меракълы бильгилер
Опубликовано:
Бу сене Номан Челебиджиханнынъ догъгъанындан 135 йыл кечти. Номан Челебиджихан миллетимизнинъ тарихында муфти, шаир, языджы, джемаат эрбабы ве сиясетчи оларакъ буюк из къалдырды. Дикъкъатынъызгъа Номан Челебиджихан акъкъында меракълы малюматны теклиф этемиз. • Номан Челебиджихан Джанкой дживарында ерлешкен Буюк Сонакъ коюнде дюньягъа кельди. Кечкен асырнынъ 70-нджи йыллары бу кой бошалды ве гъайып олды. • Онынъ бабасы Ибраим Челеби Буюк Сонакъ коюнинъ имамы, зенгин топракъ саиби эди. • Тасилини башта кой мектебинде, сонъра Акъчора медресесинде, сонъра да Зынджырлы медресесинде алды. 1908 сенеси Османлы девлетине келип, анда Истанбул университетинде укъукъ ве иляхият боюнджа алий тасилини алды. Истанбулда Къырымдан кельген талебелернен бир къач къырымтатар тешкилятыны къурды. Тюркиеде окъугъаны вакъыт Къырым талебелеринен берабер бир къач кере Исмаил Гаспринскийнен корюшти. • Тюркиеден къайткъан сонъ, базы вакъытларда Исмаил Гаспринскийнинъ эвинде яшады. • 1913 сенеси тасилини Санкт-Петербург психоневрология институтында укъукъ факультетинде девам этти. О вакъытлары бабасы ифляс этти. Санкт-Петербургда парагъа мухтадж олгъаны ичюн, чокъ къыйын ишлерде чалышты. Хусусан, ёлларны ташларнен тёшеди. Бу себептен сыкъ-сыкъ хасталанды. • 1917 сенеси, декабрь 13 куню Къырымтатар халкъынынъ I къурултайы Къырым Халкъ Джумхуриетининъ мейдангъа кетирильмесини илян этти. Номан Челебиджихан шу къурултайда Миллий акимиет директориясынынъ ве бу директория эркянындаки адлие идаресининъ реиси оларакъ сайланды. Матбуатта исе, Номан Челебиджиханны Къырым Президенти оларакъ адландырдылар. • Номан Челебиджихан большевиклер оны якъалап оладжагъыны бильди. Амма, бунъа бакъмадан, о, Къырымны терк этмеди. • Шаир, джемаат эрбабы Шевкъий Бекторе Номан Челебиджиханны бойле хатырлады: «Биз 1908 сенеси таныш олдыкъ. О, аркъадашларындан чокъ фаркъ эте эди. Гузель, темиз кийине, тертип-низамны севе эди. Юксек ахлякълы, икътисатлы инсан эди. Сигар чекмеди, алкоголь ичмеди. Вакъытны зая сарф этмеди, чокъ окъуды, чокъ чалышты…». • Филология илимлери докторы, профессор Исмаил Керимов Номан Челебиджиханнынъ хусусий чизгилерини бойле къайд этти: «Номан Челебиджихан Къырымда биринджи демократик девлет къурды, Парламент къурды, Анаяса тизди. Онынъ ичюн Къырымнынъ келеджеги пек эмиетли эди. Козь огюнъизге кетиринъиз, кучьлю бир парламент, о парламент Анаяса къабул эте. О Анаясада ханымларнынъ акълары эркеклернен мусавий сайыла. Не Тюркиеде, не Френкистанда, не де Алманияда бойле шейлер ёкъ эди. Онынъ ичюн Челебиджиханнынъ япкъан иши бугунь де пек ибретли, нумюневийдир. Эм диний, эм сиясий саада юксек севиели дипломат, стратег, илим адамы эди». • 1918 сенеси, февраль 23 куню Номан Челебиджихан анархист матрослар тарафындан джанаварджа ольдюрильди. Джеседи исе, Къара денъизге атылды. • Номан Челебиджиханнынъ «Ант эткенмен» шиири къырымтатар халкъынынъ миллий гимни оларакъ къабул этильди.
УЧЬ АЙЛАР
Опубликовано:
Динимизге коре, дюньяда олгъан эр шейни Юдже Аллах яратты. Инсаннынъ аятында олгъан эр шей де – Аллахнынъ эдиесидир. Беденимиз, барлыгъмыз, сагълыгъымыз, ана-бабамыз, эвлятларымыз, омюримизнинъ эр аны – Раббимизден кельген бирер ниметтир. Бу ниметлерге саип чыкъмакъ, ве буларны бизге берген Аллахкъа къуллукъ этмек – боюн борджумыздыр. Мерхаметли Раббимиз бу вазифемизни къолайлаштырмакъ ичюн бизге савабы къат-къат берильген вакъыт парчаларыны – мубарек ай, кунь ве геджелерни багъышлады. Бойле вакъытларнынъ энъ дегерлиси – халкъымызда «Учь айлар» дие анъылгъан маневият мевсимидир. Чюнки бу заман тилимине айларнынъ энъ мубарек олгъаны – Рамазан айы, ве геджелернинъ энъ хайырлысы – Къадир геджеси кирмекте. Учь айларгъа кирген ильки эки ай – Реджеб ве Шабан айларыдыр. Олар, савап нокъта-и назарындан берекетли вакъыт парчалары олгъанынен, ичинде мубарек геджелер булунгъанынен берабер, Пейгъамберимизнинъ хадислерине эсасен, Рамазан айына азырлыкъ оларакъ дегерлендирильген. Чюнки Рамазан айынынъ берекетине наиль олмакъ ичюн, онъа эйидже – маддий ве маневий тарафлардан – азырланмакъ керек. Меджазий бир ифаденен, Реджеб айы – экинлер сачылгъан, Шабан – суварылгъан, Рамазан исе – махсулат топлангъан айдыр. Яни, салих эдждатларымыз, Пейгъамберимизге уйып, адета, Рамазан айына Реджеб айындан башлап азырлана эдилер. Февраль 25-те башлагъан Учь айларнынъ ильки – Реджеб айы – харам айлардан биридир. Харам айлар – Ислямдан эвель де арапларда урьмет ве итибар этильген, мукъаддес ве къан тёкюльмеси ясакъ олгъан айлардыр. Бу айларда даа зияде савап беджермек, гунахтан узакъ турмакъ тырышылгъан. Къуран-ы Керимде, «Тёвбе» суресининъ 36-нджы аетинде, бойле буюрыла: «Коклерни ве ерни яраткъан кунюнде, Аллахнынъ язысына эсасен, Аллах къатында айларнынъ сайысы он экидир; олардан дёртю харам айлардыр». Пейгъамберимиз (с.а.с.) исе, буларны бизге бойле ачыкълагъан: «Шубесиз, вакъыт Аллах яраткъан шекилинен акъып кете. Йыл он эки айдыр. Булардан дёртю харам айлардыр. Учю арт-арткъа келе: Зиль-къаде, Зиль-хидждже, Мухаррем. Бир де Джумазие’ль-ахырнен Шабан айлары арасында кельген Мудар къабилесининъ айы – Реджеб айыдыр» (Бухарий, «Тефсиру суре», 8, 9). Хадислерде Реджеб айынен берабер ондан сонъ кельген Шабан ве Рамазан айлары да къошулып анъыла. Пейгъамберимизнинъ (с.а.с.) бойле айткъаны ривает этиле: «Реджеб айы – Аллахнынъ айы, Шабан – меним айым, Рамазан да – умметимнинъ айыдыр» (Аджлуний, «Кешфуль-хафа», 1/423). Дигер бир хадисте, Энес бин Малик (р.а.) ривает эткенине коре, Реджеб айы киргенде, Азрет-и Пейгъамбер бойле дуа этип, бизге де япылмасыны огреткен эди: «Аллахым! Реджеб ве Шабанны бизге мубарек эйле, ве бизни Рамазангъа къавуштыр» (Ахмед, «Муснед», 1/259). Энъ мубарек ве азиз айны Юдже Раббимиз ораза ибадетинен кечирмеге эмир эткен («Бакъара» суреси, 183). Бунъа коре, динимиздже озюри олмагъан эр бир мусульманнынъ Рамазан айында ораза тутмасы – онынъ боюн борджудыр. Ислямнынъ беш темелинден бири олгъан ораза – савабы буюк, мусульманнынъ маневий осьмесинде иссеси чокъ олгъан бир ибадеттир. Бунъа эсасен, ораза айы Рамазангъа азырлыкъ олгъан Реджеб ве Шабан айларында да чокъ ораза тутмагъа гъайрет этмели. Реджеб айы – харам айлардан биридир, Пейгъамберимиз (с.а.с.) исе, харам айларда учер кунь ораза тутып, учер кунь тутмамакъны тевсие эткен эди (Эбу Давуд, «Савм», 54). Аллахнынъ Эльчиси (с.а.с.) Шабан айында чокъ ораза тута эди. Хазрет-и Айше анамыз (р.а.) бойле ривает эте: «Ресулюллах (с.а.с.) базы айларда чокъ ораза тута эди. Атта, биз оны бу айда ич ифтар этмегенини айта эдик. Базы айларда да чокъ ифтар эте эди. Атта, биз оны бу айда ич ораза тутмагъаныны айта эдик. Ресулюллах (с.а.с.) Рамазандан башкъа бир айнынъ оразасыны тамамлагъаныны корьмедим. Шабандаки къадар чокъ ораза тукъаны бир айны да корьмедим» (Бухарий, «Савм», 51). Энес бин Маликтен (р.а.) ривает этильгенине коре, Пейгъамберимизден бойле суаль сорагъанлар: «Рамазандан гъайры энъ фазилетли ораза айы къайсы айдыр?» Пейгъамберимиз (с.а.с.) бойле джевап берди: «Рамазанны тазим ичюн (Рамазан урьметине) Шабанда тутулгъан оразадыр» (Тирмизий, «Зекят», 28). Пейгъамберимизнинъ суннетине уйып, Реджеб ве Шабан айларында, эр базар эртеси ве джума акъшамы куньлери ораза тутула билир. Аллах Ресули (с.а.с.): «Амеллер Аллах Таалягъа базар эртеси ве джума акъшамы куньлеринде арз этиле. Мен де амелимнинъ оразалы олгъанымда арз этильмесини истейим», – буюргъан эди. Оразанен берабер Къуран-ы Керим окъумакъ, суннет ве нафиле намазлар къылмакъ, садакъа бермек, илим огренмек, ал-вазиетимизни тюшюнип, даа гузельге ынтылмакъ, къоранта азаларына, сой-сопкъа, эш-досткъа ве эр бир инсангъа эйилик япмакъ киби ибадетлер де чокълаштырылмалы. Учь айлар ичинде олгъан мубарек геджелерни – Реджеб айынынъ ильк джума геджеси – Регъаиб къандилини, шу айнынъ сонъундаки Мирадж геджесини, Шабан айынынъ ортасында ерлешкен Бераат геджесини, ве Рамазаннынъ сонъунда ерлешип, бинъ айдан даа хайырлы олгъан Къадир геджесини энъ семерели шекильде кечирейик, эбедий юртумыз ичюн азырлыкъ япайыкъ, озюмиз ве этрафымыздаки инсанлар ичюн дуа этейик. Учь айлар киргенинен Пейгъамберимизнинъ шу дуасыны айтмагъа унутмайыкъ: «Аллахумме барик лена фи Раджебе ве Шабан вебеллигъна Рамазан». Юдже Раббимиз Реджеп ве Шабан айларыны бизлер ичюн мубарек ве берекетли этсин, джумлемизни де Рамазан-ы Шерифке къавуштырсын! Эмира-Асан Умеров
Гедже, ашалгъан я да ичильген бир шейнинъ устюни орьтмек
Опубликовано:
Ислям дини, инсаннынъ маневий дюньясыны къорчалагъаны къадар, онынъ беден сагълыгъынен де къорчалай; сагълыкъкъа зарар кетирген шейлерни ясакълай, онъа сагълыкъ ве кучь къазандыргъан шейлерни мубах къыла (япылмасыны ясакъ этмей). Бу шекильде сагълыкънынъ къорчаланувына зиядесинен эмиет бере. Ресулюллах Эфендимиз – рахмет эдиеси ве сонъки тенбиелейиджидир. О, Аллахтан алгъаныны беян эткен. Озюнден бир хукюм къоймагъан, озь кейфине коре бир шейни элял я да мубах саймагъан. О, он беш асыр эвельси булашыджы (хастадан башкъасына япышкъан) хасталыкъкъа себеп олгъан микроб ве вирусларны, зарарлы бактерияларны дикъкъаткъа алып, булардан къорчалайджакъ етмиштен зияде эмир ве тевсие берген. Олардан бири де, хусусан, ичинде аш ве ичеджек олгъан къапларнынъ агъызыны къапалы тутмамызны эмир этмесидир. Онынъ ичюн къартбаба ве къартаналарымыз эр даим буны япалар ве бизден де истейлер. Демек ки, Пейгъамберимизнинъ эмирини ерине кетирелер. Аллах олардан разы олсун. Пейгъамберимизнинъ бу эмирини косьтерген ве делиль олгъан хадислер булардыр: Сахабелерден Джабир бин Абдуллахтан (р.а.) япылгъан риваетте Ресулюллах Эфендимиз бойле буюргъан эди: «Айван терисинден япылгъан сув къабынынъ агъызыны йипнен сыкъыджа багъла ве Аллахнынъ исмини анъ, къапнынъ устюни орьт, Аллахнынъ исмини анъ, истесе, бу орьтю онынъ устюне бир чубукъ къоймакънен олсун (ихмал этме)!» ( Бухарий, «Бедъу’ль-халькъ», 11; Эбу Давуд, «Эшрибе», 22). Муслим япкъан риваетте Ресулюллах Эфендимиз бойле буюргъан: «Савутны яхшы этип орьтюнъиз, сув къабынынъ агъызыны яхшы этип багъланъыз. Чюнки йыл ичинде ойле бир гедже бар ки, онда веба (юкъунчлы хасталыкъ) эне де, устюнде орьтю (къапакъ) олмагъан бир савут, агъызы сыкъыджа багълы олмагъан бир сув къабы бар исе, мытлакъкъа онынъ ичине о вебадан энер (кирер)» (Муслим, «Эшрибе», 96, 99; Ибн Мадже, «Эшрибе», 16; Ахмед, 3-355). Хадис-и шерифлерден шу анълашыла: 1. Сув ве аш къоюлгъан къапларнынъ, чанакъларнынъ агъызыны орьтмек суннеттир. Ачыкъ ташламакъ мекрухтыр. 2. Къапларнынъ агъызыны орьткенде де, ачкъанда да, Аллахнынъ адыны анъмакъ, «Бисмиллях», демек – суннеттир. 3. Булашыджы хасталыкъны асыл эткен я да инсан сагълыгъы ичюн телюкели олгъан шейлерден къорчаланмагъа тырышмакъ, оларнынъ огюни алмакъ, сонъра да Аллахкъа ишанып таянмакъ – суннеттир. 4. «Веба» сёзю – юкъучлы хасталыкъларнынъ умумий ады эди. Ресулюллах Эфендимизнинъ: «Йылда бир гедже бар ки, о гедже веба эне…» буюрмасы гъает анъламлыдыр. Къадыр геджеси Рамазан айында сакълангъаны киби, хасталыкъны асыл эткен микробларнынъ къайсы геджеси энеджеги, къапларгъа киреджеги белли дегильдир. Бойле экен, эр гедже эне биле, демек. Буны козь огуньде тутып, къапларны яхшы этип орьтмек керек. Къадир геджеси не къадар берекетли исе, хасталыкъкъа алып кетирген микроблар да о дередже ольдюриджи ве йыкъыджыдыр. 5. Пейгъамберимиз, он дёрт асыр эвельси телюкели хасталыкъкъа алып кельген микробларгъа, вирусларгъа дикъкъатны «веба» сёзюнен чеккен. Мевзунен алякъалы башкъа риваетлер де бар: «Къапыны килитле ве Аллахнынъ исмини анъ. Чюнки, керчектен, шейтан килитли бир къапуны ачамаз. (Яткъанда,) чыракъны сёндюр ве Аллахнынъ исмини анъ. Къапнынъ устюни орьт, истесе, устюне къояджагъынъ бир чубукънен олсун (ихмал этме) ве Аллахнынъ исмини анъ. Сув къабынынъ агъызыны яхшы этип багъла ве Аллахнынъ исмини анъ...» (Бухарий, «Бедъу’ль-халькъ», 15; «Эшрибе», 22; Эбу Давуд, «Эшрибе», 22; Ахмед, 3/301, 319); «Шубесиз ки, шейтан ич бир килитли ерни ачамаз, агъызы багълы олгъан ич бир сув къабына киремез ве орьтюли ич бир савутны ачамаз. Ве, керчектен, фасыкъчыкъ (зарарлы махлюкъат) инсанларнынъ устюне эвлерини якъып-якъып тутуштыралар!» (Эбу Давуд, «Эшрибе», 22; Тирмизий, «Этъиме», 15; Табераний, «Сифату’н-Небий», 21; Ахмед, 3/386, 395). Джабирден (р.а.) бильдирильген риваетте бойле денъиле: «Ресулюллах Эфендимизнен берабер эдик. Ичмек ичюн сув истеди. Андакилерден бир адам: «Сизге хурма шырасыны ичиртейимми?» – деп сорады. О да: «Эльбетте», дегенден сонъ, адам бутюн кучюнен ашыкъып чыкъты ве чокъ кечмеден, ичинде хурма шырасы олгъан бир бардакънен кельди. Ресулюллах Эфендимиз онъа: «Устюне къояджагъынъ бир чубукънен биле олса, оны орьтсейдинъ, я!» – деп буюрды» (Муслим, «Эшрибе», 94; Эбу Давуд, «Эшрибе», 22; Ахмед, 3/314). Булардан анълашыла ки: 1. Ичинде аш я да сув олгъан къапларнынъ агъызыны орьтмек керек. 2. Бир ерге кеткенде я да юкъламагъа яткъанда, къапыларны килитлемек керек. 3. Лампа, чыракъ ве оларгъа ошагъан шейлерни сёндюрип, юкъламакъ я да эвден айырылмакъ керек. Бу тедбирлернинъ бир де маневий джеэттен къорчаланув макъсады бар. Белли этильген хусусларда тедбир алгъанда, Аллахнынъ адыны анъмакъ («Бисмиллях») демек... Аллахнынъ исмини анъмакъ, къорчалайыджы мелеклернинъ кельмесине себеп ола. Бу да косьтере ки, биз Аллахны хатырлап, Ондан ярдым истегенимизде, О, Озюне ёнельген къулларыны рахмет мелеклеринен къорчалай. Буны унутмайыкъ ки, Аллах джумлемизни къорчаласын. Раим ГЪАФАРОВ
Аллахнынъ 99 ады
Опубликовано:
Эль-Мутекеббир – буюкликте эши, бенъзегени олмагъан. Аллах буюктир! Буюклик тек Онъа хастыр. Ич кимсе ве ич бир шей Раббимизге бенъземей. О,a яратылгъанларгъа хас олгъан сыфатлардан узакътыр. Эр бир махлюкъта Онынъ буюклиги ифаде этиле. Раббимиз Озю Къуран-ы Керимде бойле дей: «О, Аллах, Ондан гъайры Илях ёкъ. .О – Маликтир (эр шейге саиптир), Къуддустыр (эр тюрлю эксикликтен узакътыр), Селямдыр (къулларыны селяметликте ве эсенликте туткъандыр), Муминдир (хавфсызлыкъ бергендир), Къоругъандыр, Азиздир (сонъсуз устюнликке саип олгъандыр), Джеббардыр (Истегенини ич бир маниасыз япкъан ве яптыргъандыр), Мутекеббирдир (керчек буюкликке ляйыкъ олгъандыр). Аллах Онъа къошкъанлары шериклерден узакътыр» («Хашр» суреси, 59/23 ает). Бизим ич бир тюрлю кучюмиз ёкъ, биз аджизмиз, Аллах исе, буюктир, мутекеббирдир. Эгер буны анъласакъ, иманымыз къуветленир ве Раббимизнинъ бизге севгиси артар. Эр-Раззакъ – Бутюн махлюкъларнынъ рызыкъыны берген ве ихтияджларыны къаршылагъан. «Эр-Раззакъ» сёзю «рызыкъ» сёзюнден мейдангъа келе, «рызыкъ» сёзюнинъ манасы да – инсангъа бу дюньяда яшамасы ичюн керек олгъан шейлердир. Яни, Раббимиз инсангъа бутюн аяты девамында эр кунь берген ниметлердир. Аллах бу кяинатны ве ичиндекини яратты. Бизге де бу яраткъанларыны къулланувымызгъа берди. Къуран-ы Керимде Аллах бойле дей: «Шубесиз, Аллах рызыкъ берген, сагълам къувет саибидир» («Зарият» суреси, 51/58 ает). Башкъа аетте де бойле кече: «Эй, инсанлар! Аллахнынъ сизге олгъан ниметини хатырланъыз; Аллахтан башкъа сизге коктен ве ерден рызыкъ береджек бир яратыджы бармы? Ондан башкъа илях ёкътыр. Насыл ола да, (тевхидден куфюрге) чевирилесинъиз?» («Фатыр» суреси, 35/3 ает). Бу дюньяда, иман эткенге де, иман этмегенге де, Аллах эр кеске рызыкъыны бере. «Ер юзюнде рызыкъы Аллахкъа аит олмагъан ич бир джанлы ёкътыр...» («Худ» суреси, 11/6 ает). Рызыкъ Аллахтандыр, бизим ишимиз исе, Онъа дуа этип, элимизден кельгенини япмакъ. Эль-Алим – Бильген. Сакълы, ачыкъ, кечкен, келеджек, эр шейни, энъ тафсилятлы шекильде бильген. Эль-Алим ады «илим» сёзюнден мейдангъа келе. «Илим» сёзюнинъ манасы – бильги, анълав (асылны корьмек). Аллахкъа нисбетен бу сёзнинъ манасы даа кеништир, Онынъ бильгиси махлюкъларнынъ бильгисинден фаркъ эте. Инсаннынъ илими сынъырлангъан ве аздыр, Раббимизнинъ илими исе, минсиздир ве сынъырсыздыр, Аллахнынъ Озюнинъ, Онынъ яраткъанларынынъ арекетлерини ве бутюн кяинатта олып кечкенлерни къаврап ала. Аллахнынъ бу ады Къуран-ы Керимде 157 кере анъыла. Бойле аетлернинъ бири будыр: «О, ойле Аллахтыр ки, Ондан башкъа илях ёкъ. О, корюнмегенни ве корюнгенни бильгендир. О, Рахмандыр, Рахимдир» («Хашр» суреси, 59/22 ает). Ич бир шей Аллахнынъ бильгисинден тыш къалмаз! Ич бир шейни Ондан сакълап оламамыз. «Гъайыпнынъ анахтарлары Аллахтадыр; оларны (сакълы шейлерни) Ондан башкъасы бильмез. О, ерде ве денъизде не бар исе (эписини) биле; Онынъ илиминден тыш (хабери олмадан) бир япракъ биле тюшмез. О, ернинъ къаранлыкълары ичиндеки тек бир данени биле билир...» («Энам» суреси, 6/59 ает). Эгер буны яхшы анъласакъ, эр ишимизни япкъанымызда буны хатырласакъ, иманымыз даа да къуветленир. Таир ИБРАИМОВ
Аллах къышны не гузель яратты!
Опубликовано:
Къыш татиллери девамында балаларнен эгленмек ичюн меракълы фикир теклиф этемиз. Къыш къарлы олмаса, биз къыш муитини озь эллеримизнен япа билемиз! Дёрт мевсимден бири олгъан къыш озь гузелликлеринен бизни къувандыра. Гузелликлернинъ яратыджысы да, эльбетте, Аллаху Таалядыр. Юзюнъизге энген эр бир къар данеси, пенджерелерни яраштыргъан муджизевий орьнеклер, темиз ве тазе ава – бунынъ эписи Аллахнынъ аляметиндендир. Келинъиз, берабер шу гузель мевсимни ифаде этеджек бир сувенир япайыкъ. Керекли мальземелер: 1. Банка (къапакъ иле), 2. Пенопласт, 3. Туткъал, 4. Леска, 5. Шекер, 6. Ине. Банканынъ къапагъыны истегенинъиз ренкте бояламакъ мумкюн. Бир къач пенопласт данечигини иненен йипке (лескагъа) кечиремиз. Бу шекильде бир къач йипни азырлаймыз. Банканынъ тюбюни шекернен толдурамыз. Ичине де кучюк оюнджакъларны ерлештиремиз (терек я да айванчыкъ ола биле). Эвельден азырлангъан йиплерни къапакънынъ ич тарафына туткъалнен япыштырамыз. Банка къапалгъанда, шу пенопластнен йиплери къар ягъгъаныны ифаде этип, асылып тураджакълар. Сувениримиз азыр! Гульсум ШИРИНСКАЯ